«TA’LIM VA MUTAXASSISLIK»

Poytaxtimizda ana shu mavzuga bag’ishlab tashkil etilgan navbatdagi ko’rgazmada yoshlarimiz o’zlari qiziqqan sohalar bo’yicha batafsil ma’lumot olishmoqda.

Mamlakatimizda yosh avlodga jahon andozalari darajasida ta’lim berishga alohida e’tibor qaratilmoqda. Xususan, “Ta’lim to’g’risida”gi Qonun, Kadrlar tayyorlash milliy dasturi doirasida bu yo’nalishda keng ko’lamli ishlar amalga oshirilayapti. Ko’plab yangi maktab, kollej, litseylar, oliy o’quv yurtlari barpo etilib, ular ilg’or axborot texnologiyalari, o’quv-uslubiy vositalar bilan ta’minlanayotir.

Yurtboshimiz Navro’z bayramiga bag’ishlangan tantanali marosimdagi tabrik so’zida ham ertamiz egalari haqida to’xtalib, jumladan, shunday dedi: “Bizning tayanchimiz va suyanchimiz bo’lmish O’zbekiston yoshlariga qarata aytmoqchiman: boshimizdan kechirayotgan, shiddat bilan o’zgarib, tobora murakkablashib borayotgan davr barchamizning, birinchi navbatda, siz, aziz farzandlarimizning oldiga zamonaviy bilim va kasb-hunarlarni, -intellektual boyliklarni chuqur egallash, shu bilan birga, mamlakatimizning xalqaro maydonda raqobatdoshligini yangi bosqichga ko’tarish, iqtisodiyotimizni yangilash, modernizatsiya va diversifikatsiya qilish, bularni taraqqiyotimizning lokomotiviga aylantirish kabi vazifalarni qo’ymoqda”.

Darhaqiqat, mana shu fikrlar zamirida ham farzandlarimizni kelajakka tayyorlash, ularga g’amxo’rlikni yanada kuchaytirish, zamonaviy asosda ta’lim-tarbiya olishlari uchun keng imkoniyat yaratish, pirovardida o’z sohasining mohir mutaxassisi bo’lib yetishishlarini ta’minlash kabi boshqa ko’plab dolzarb masalalar mujassam, desak, yanglishmaymiz.

Kecha poytaxtimizdagi Yoshlar ijod saroyida boshlangan “Ta’lim va mutaxassislik — 2016” 14-xalqaro ko’rgazmasi ana shu ezgu maqsadlarga qaratilgani bilan yanada ahamiyatlidir.

Mazkur anjuman davlatimiz rahbarining 2014-yil 6-fevraldagi “O’zbekiston Respublikasida yoshlarga oid davlat siyosatini amalga oshirishga qaratilgan qo’shimcha chora-tadbirlar to’g’risida”gi qaroriga muvofiq, “Kamolot” yoshlar ijtimoiy harakati, Oliy va o’rta maxsus ta’lim, Mehnat vazirliklari, O’rta maxsus, kasb-hunar ta’limi markazi, Savdo-sanoat palatasi hamkorligida tashkil etildi.

Mamlakatimiz yoshlarini O’zbekiston va xorijiy davlatlar ta’lim tizimi bilan yaqindan tanishtirish, o’g’il-qizlarimizning qiziqqan sohalari bo’yicha ta’lim muassasalarini tanlashlariga ko’maklashish hamda mutaxassislik faoliyatidagi ma’lum yo’nalishlar bo’yicha ish o’rinlarini taqdim etishga xizmat qilayotgan ushbu tadbirning nufuzi yildan-yilga oshib bormoqda. Xususan, o’tgan yillarda ishtirokchilarning 25 foizi ayni shu loyiha tufayli o’zlarini qiziqtirgan oliy o’quv yurtlari va kelgusida egallaydigan mutaxassisliklarini tanlash imkoniga ega bo’lgan. Bundan tashqari, bu yerdagi bo’sh ish o’rinlari yarmarkasida ikki mingdan ziyod yigit-qizlar doimiy ish bilan ta’minlanayotgani ham quvonarlidir.

Joriy yilgi xalqaro anjumanda mamlakatimiz bilan birga, Singapur, Germaniya, AQSh, Polsha, Buyuk Britaniya, Xitoy, Latviya, Malayziya, Ispaniya, Kanada, Shveysariya kabi qator davlatlar yetakchi oliy ta’lim muassasalari, ish beruvchilar, turli markazlar qatnashayotganini ta’kidlash joiz.

…Yoshlar ijod saroyining birinchi qavatida yurtimizdagi turli korxonalar, Mehnat vazirligining Toshkent shahridagi bandlikka ko’maklashuvchi markazlari stendlari joylashtirilgan bo’lsa, majmuaning ikkinchi qavatida yurtimizdagi oliy o’quv yurtlari, xorijiy ta’lim muassasalari haqida taqdimotlar namoyish etilayotir.

— O’zbekiston bilan Germaniya o’rtasidagi do’stona munosabatlar barcha sohada, jumladan, ta’lim yo’nalishida ham izchil rivojlanib borayotganidan xursandmiz, — deydi Germaniyadagi “ISL Sprachschule” nomli xorijiy tillar maktabining marketing bo’yicha direktori Katya Fridel. — Bizning ta’lim maskanimiz mamlakatimizdagi oliy o’quv yurtlariga kirish uchun o’quvchilarni tayyorlaydi. Tahsil to’qqiz oy davom etadi. -Muassasamizga kirish uchun akademik litseyni tamomlash va nemis tilini bilish talab qilinadi.

Ko’rgazma qatnashchilarining aksariyati Osiyo davlatlaridagi xorijiy oliy o’quv -yurtlariga qiziqish bildirayotgani diqqatimizni tortdi. Chunonchi, Xitoyning Lanchjou texnologiya universiteti koordinatori Suy Lixonning aytishicha, mazkur ta’lim muassasasiga har yili yurtimizdan 30 ga yaqin yigit-qiz o’qishga kirar ekan.

“Ta’lim va mutaxassislik” 14-xalqaro ko’rgazmasi 2 aprelga qadar davom etadi.