«SOHIBQIRON.UZ» SAYTI YARATILDI

Toshkent axborot texnologiyalari universiteti Qarshi filiali mutaxassislari tomonidan “sohibqiron.uz” sayti yaratildi. Bu buyuk bobomiz Amir Temur tavalludining 680 yilligiga o’ziga xos tuhfa bo’ldi.

Shu munosabat bilan viloyat hokimligida yangi saytning taqdimot marosimi o’tkazildi. Unda tarixchi olimlar, o’qituvchilar, talabalar hamda keng jamoatchilik vakillari ishtirok etdi.

Mazkur saytga Amir Temur shaxsi, uning sarkarda sifatidagi faoliyati, bunyodkorlik ishlari, ilm-fan rivojiga qo’shgan hissasi, qolaversa, Sohibqironning umr yo’liga oid mufassal ma’lumotlar joylashtirilgan. Ulug’ ajdodimiz siymosiga oid foto va videolavhalar ham mavjud. Veb-sahifadagi ma’lumotlar o’zbek, ingliz va rus -tillarida taqdim qilinayapti.

TATU Qarshi filiali axborot texnologiyalari kafedrasi mudiri Abdurahmon Cho’ponovning ta’kidlashicha, texnik jihatdan juda qulay va foydalanuvchilar uchun oson ishlangan mazkur saytga “Android” operatsiya tizimiga ega mobil aloqa vositalari orqali ham kirish mumkin. Saytni yanada takomillashtirish borasida izlanishlar davom ettirilmoqda.