BOG‘DORCHILIK RIVOJI YO‘LIDA

Surxondaryo viloyati Jarqo‘rg‘on tumanida Germaniya Xalqaro hamkorlik jamiyati (GIZ) tomonidan tashkil etilgan namunaviy intensiv bog‘ning ochilish marosimi bo‘lib o‘tdi. 

Tadbirda O‘zbekiston Respublikasi Qishloq va suv xo‘jaligi vazirligi, O‘simlikshunoslik ilmiy-tadqiqot instituti, Fermerlar kengashi, Surxondaryo viloyati hokimligi, viloyat davlat o‘rmon xo‘jaligi, Savdo-sanoat palatasi viloyat hududiy boshqarmasi va bog‘dorchilikka ixtisoslashtirilgan fermer xo‘jaliklari rahbarlari ishtirok etdi.

O‘zbekiston O‘simlikshunoslik ilmiy-tadqiqot instituti direktori Amir Omonov, Germaniya Xalqaro hamkorlik jamiyati loyiha rahbari o‘rinbosari Yuxanna Volmayer va boshqalar mamlakatimizda fermerlik harakatini rivojlantirishga qaratilayotgan doimiy e’tibor iqtisodiyotimizni yuksaltirish, aholi farovonligini oshirish, xalqimizni sifatli va servitamin oziq-ovqat mahsulotlari bilan ta’minlashda yuksak samaralar berayotganini ta’kidladi.

Prezidentimizning 2012-yil 22-oktabrdagi “O‘zbekistonda fermerlik faoliyatini tashkil qilishni yanada takomillashtirish va uni rivojlantirish chora-tadbirlari to‘g‘risida”gi farmoni bu borada muhim dasturilamal bo‘lmoqda.

Bugungi kunda Surxondaryo viloyatida 2 ming 592 gektar maydondagi intensiv bog‘dan mo‘l hosil olinmoqda. Bu yil bog‘dorchilik fermer xo‘jaliklari yana 1 ming 299 gektar maydonda intensiv bog‘ yaratdi.

Germaniya Xalqaro hamkorlik jamiyati tomonidan O‘simlikshunoslik ilmiy-tadqiqot instituti Surxondaryo tajriba stansiyasi hududida 5 gektar maydonda intensiv bog‘ barpo etilgan.

– Ushbu namuna-tajriba bog‘ida Yevropada yetishtiriladigan olma, gilos, olxo‘ri, behi kabi mevali daraxt ko‘chatlarining issiq iqlim va garmselga chidamli 20 dan ortiq navi turli o‘lchamlarda ekilib, sinovdan o‘tkazilmoqda, – deydi O‘simlikshunoslik ilmiy-tadqiqot instituti Surxondaryo tajriba stansiyasi rahbari Hayitboy To‘raqulov. – Kelgusida eng yaxshi rivojlangan navlar tanlab olinadi va ko‘paytirilib, bog‘dorchilik fermer xo‘jaliklariga yetkazib beriladi. Bog‘bonlar uchun o‘quv markaziga aylanib borayotgan mazkur bog‘da istiqbolli yangi navlarni saralash uchun barcha sharoit yaratilgan.

Tadbir doirasida soha mutaxassislari va fermerlar yangi intensiv bog‘da parvarishlanayotgan ko‘chatlarning rivojlanishi, ularga ishlov berish va zararkunandalarga qarshi kurashish usullari bilan tanishdi, o‘zaro tajriba almashdi.